Eh ben mes frères, vl'a qu'aujourd'hui, ch'est la sainte Barbe !

Ed'pi d'ta'leur, in n'a djà intindu… su Chainte Barbe, chez mineurs…

Chez tiots y n'ont eu plein le zoreilles…

Comme cha, i savtent mieux chu qu"chan n'étot que d'vive ichi al siècle dernier…

al vie n'etot pas toudis rose…

eh quind j'dis rose, cht'un rose aveuc grimmin d’noir in’din…

al vie n'etot pas toudis rose…

mais y z'iallotes chez mineurs…

i deschindotes din la fosse, l'cœur à l'ouvrache, pour ermonter ch'carbon, mais à travers ch'carbon, chetot pour ermonter de quo faire viv le femme et le sinfants…

Mes frères, mes sœurs, ravisez bin ch'mouvement :

i deschindotes pour ermonter…

et quin t'y zetotent au fond, iz avotent din l'tête le femme et le zinfants qu'étotent in haut… et cha leur donno du cœur à l'ouvrache…

Et quind y z'étotent revenus à terre, i zetotent fiers, ed'ramener l'fruit d'leur ouvrache…  l'fruit d'leur ouvrache…

e coc cha n'est que l'fruit d'leur ouvrache… ch'carbon, non !

ch'carbon y'etot fait pour être brûlé…

ch'carbon, ch'étot pour cauffer chez maisons…

ch'étot dl'énergie pour chez usines…

L'fruit d'leur ouvrache, cha n'étot pas ch'carbon, mais chu que ch'carbon y permettot de faire pour la vie dchez hommes, sul terre…. in haut…

et pis, surtout, l'fruit d'leur ouvrrage, cha n'étot pas ch'carbon pacque…

z'avez intindu dt'aleur… fallo ch baquet d'eau pour le faire partir ch'carbon…

l'fruit d'leur ouvrache, cha n'étot pas ch'carbon, ch'etot d'faire viv le femme et le zinfants…  chetot d'ramener s'quinzaine !

L’quinzaine de Ste Barbe d’ailleurs, elle étot souvent + grosse e qu’les autes, vu qchez mineurs i zavotent fait double poste pour avoir un tiot peu puk d’sous…

Et même qu’avant l’nationalisation, l’quinzaine de Ste Barpe, te n’y’avait bon le 2 dech’ mos, sinon fallot atteindre jusqu’au alors qul’es autes mois, ch’étot le 10 dech’mos…

L’quinzaine, l’fruit de l’ouvrache…

Voyez-vous, ch'est là qued'cos ed'fort important…

quin in fait s'n'ouvrache, d'pinser à ch'fruit d'l'ouvrache… a chu que ch't'ouvrache i rind possible pour dz'autes…

et che'est vrai aussi pour chez tiots qui vont à l'école, au collège, au lycée…

i font leur ouvrache, le d'voirs, le s’additions, le soustraction, pour qu'un jour leur ouvrache, i donne du fruit  pour d'zautes…

et ch’est encore plus vrai pour chez pompiers… l’fruit d’leur ouvrache, cha n’est d’abord ni leur quinzaine, ni leur mois, mais l’fruit de l’ouvrache d’chez pompiers, ch’est tous chez hommes qui sont sauvés…

L’fruit de l’ouvrache…

Et quo qu'chez qu'in fait a'l'messe ?

Quin in amène ch'pain… chez hosties… e ch'pinard…

ch'curé, vl'a qui dit : T'es béni, Dieu ed tous chez pays, du ciel et de l'terre…  et même d'sous terre…

T'es béni, ti qui nous donne ch'pain , fruit de l'terre, et de l'ouvrache ed'chez hommes…

quin in vint a'l'messe, in vint avec l'fruit d'nos ouvraches….

et ch'curé, quo qu’ch » qu’yn fait ?

i'l'fait monter vers ech' bon Dieu !!!

pour qcha r'dechinde aveuc tout sin béghin…

Hier à l’messe, in a intindu :

Que le bon Dieu vous donne, à vous'autes et à tertous…

un beghin qui so toudis d'vant…  un beghin qui n'y est toudis de puc…

Chainte Barbe, z'avez intindu s'nhistoire ed'taleur…

Elle n'est pas descindu à l'fosse…

Mais elle est descindu din sin cœur, et sin cœur, y'etot devenu lourd edcause que sin père i voulot le marier aveuc un homme qu'elle n'aimot pas…

Et comm chez mineurs, qui quin t’ch'étot dur din ch'fond pinchotent à l'jour…

ste Barpe, comme ch'étot dur din l'fond d'sin cœur, elle a pensé in haut, à ch'bon Dieu…

Et savez-vous comment Ste Barpe elle pensait à ch’bon Dieu… din l’tour dù qu’elle étot priosonnière, elle avot réussi à ch’quin fasse tro fenêtres… tro fenêtres : un’ pour ch’père du ciel, un’ pour ch’fils, Jésus, et un’ pour le St Esprit…  Comme cha, elle pouvot toudis pinser àch’bon Dieu, Père, fils et St-Esprit,

et ch'bon Dieu i n'y a donné du courache pour résister à sin père, et n'pas faire chu qu'sin cœur i n'étot pas d'accord…

Mes amis, vla un’ bonne leçon pour viv'…

Quind tin cœur y'est lourd, qu'te traine in'din ed ti même… faut qu'te ravise in haut….  vers ech’ jour…  faut qu'te ravise vers ech’ ciel… vers ech’ bon Dieu….

et v'la qu'tin cœur i va être ersaqué par ech’ bon Dieu…

et i n'sera pu lourd…

ch'est chu qu'Jésus i dit din ch'livre…

tin te sur ton 31…  t'indors pas… prie min père…

r'dresse ed tête… vla qui vint !

qui cha… ?

L’ fils de l'homme !

qui cha… ?

L’ fils de l'homme !

Pour Noêl, in attind pas el'naissance de" ch'tiot Jésus din l'crèche…

in attind que ch'grand Jésus i r'vinche avec ter tous… qui sot vivant din tous nos quartiers …

Et chez pour cha que qui n'a grimmin parmi vous'autres, qui sont in train d'ouvrer pour que din l'crèche géante qui s'ra chi din l’fond de l’église d’ici 15 jours ed’long, in puisse y raviser  chez quartiers et chez gins d'Hénin à l'ouvrache…

In’a même qui sont in train de fabriquer un camion de pompiers pour mett’ din l’crèche…

ed'sorte que tout l'ouvrache d'chez gins d’Hénin, tout'le vie quoi, tout s’n’ouvrache, i soit r'monté vers ech'bon Dieu, et qu'Jésus i vinche ed' din…

Chez cha Noël : qu’Jésus i vinche in’din de nos vies…

Ainsi soit-il !